Gipasalig sa National Police Commission (NAPOLCOM) nga patas ang imbestigasyon niini batok sa 12 ka mga pulis nga nalambigit sa kaso sa mga missing sabungero.
Kon kahinumdoman, gipahamtang sa komisyon ang 90 ka adlaw nga preventive suspension sa maong gidaghanon sa mga polis.
Sa gipaambit ni NAPOLCOM Vice Chairperson ug Executive Officer Rafael Vicente Calinisan nga kini nga lakang gitumong sa pagmintinar sa integridad sa imbestigasyon.
Makatabang usab kini nga mapugngan ang bisan unsang impluwensya sa mga saksi ug ebidensya nga ipresentar.
Lakip sa gisuspenso mao sila si Police Colonel Jacinto Malinao Jr., P/LtCol Ryan Jay Eliab Orapa, P/Major Mark Philip Simborio Almedilla, ug uban pa.
Gipasakaan na usab sila og kasong Grave Misconduct and Conduct Unbecoming of a Police Officer.
Apil sila sa gipasanginlan ni whistle blower Julie ‘Dondon’ Patidongan kalabot sa pagkahanaw ug pagpatay sa mga missing sabungeros.
