METRO MANILA-Gipanghimakak sa House Committee on Public Order and Safety chairman ug Santa Rosa City Rep. Dan Fernandez nga madiktaran ra ang quad committee sa House of Representatives kalabot sa imbestigasyon niini sa ilegal nga operasyon sa POGO, pagbaligya sa ilegal nga drugas ug mga kaso sa extrajudicial killings sa war on drugs sa Duterte administration.
Matod ni Fernandez nga dili mahimong diktahan sa liderato sa House of Representatives ang imbestigasyon sa mga komitiba niini.
Dugang pa, nga si Speaker Ferdinand Martin Romualdez wala usab nagporma sa quad committee.
Ang pamahayag ni Fernandez maoy tubag sa pangutana kalabot sa gipasabot ni Sen. Ronald dela Rosa nga adunay taas nga opisyal nga nagdiktar sa quad committee isip kabahin sa plano sa pagguba sa anti-drug campaign sa miaging administrasyon.
Si Dela Rosa maoy hepe sa Philippine National Police aron ipatuman ang war on drug campaign ni kanhi Presidente Rodrigo Duterte.
Gitataw ni Fernandez nga adunay kapin sa 300 ka mga kongresista sa Kamara ug lisod silang diktahan silang tanan.
Giingon nga lisod diktahan ang usa ka resource person kay basin og mobali kini.
Gipa-ambit pa niini, nga natukod ang quad committee tungod kay namatikdan ni Committee on Dangerous Drugs chair Robert Ace Barbers, Committee on Public Accounts chair Joseph Stephen Paduano, ug Human Rights committee chair Bienvenido Abante nga managsama ang mga resource persons nga nalambigit nga gi-imbestigasyon sa ilahang mga komite.
Ang upat ka mga chairperson gikatahong nakig-estorya kang Senior Deputy Speaker Aurelio “Dong” Gonzales Jr. Kalabot niini, mihatag siya og privilege speech ug nisang-at og resolusyon aron lanatwon ug botohan sa plenaryo ang sugyot sa pagporma sa quad committee.
