Maayo ang nahimung dagan sa impeachment complaint hearing batok kang Vice President Sara Duterte niadtong Abril 14, tungod kay hinay-hinay nang napagawas ang mga ebedinsya batok reklamon nga gisang-at sa bise presidente, matod pa ni Rep. Percival Cendaña .
Dugang pamahayag ni Cendaña atol sa eksklusibong pakighinabi sa Bombo Radyo Cebu kaniya, sa mahinomdoman sa katawhan, 2 ka tuig pa ang nilabay nga nisang-at na sila sa unang impeachment complaint hearing batok sa bise presidente, hangtud niabot sa punto nga na-ungot kini sa Senado, ug ingun man sa desisyon sa Korte Suprema.
Dugang niya, nga sa maong pagduso sa complaint mas angayan unta kini nga hagbay rang gihisgutan, ug ingun man hinay-hinay na nga molusot kung unsa ang kamatuoran.
Hinungdan nga mibutyag si Cendaña nga kung basihan ang pagdungog sa milabayng adlaw, arang-arang kini gumikan kay nilusot na ang pipila ka kamatuoran ug ang tanang pagpang-abuso sa bise presidente gikinahanglan nga hingpit nga ma-impeach na kini.
Subay niini, gipanglangtawan usab ni Cendaña nga sukad palang sa unang impeachment complaint batok sa bise presidente, daan na kining adunay igong basehan ug ebidensya, hinungdan nga gibotaran kini sa iyahang habig para i-transmit sa Senado.
Apan gitino niya nga ang pagdungog maong reklamo batok kang Duterte mao ang angay nga sumbanan sa katawhan nga angayan lang nga ang bise presidente matang-tang na sa iyahang katungdanan, ug ma-disqualify na sa bisan unsang public post, tungod kay dili na kini angay sa political office.
Ingun man nga gitino ni Cendaña nga ang tanang testamento ni Ramil Madriaga kini adunay “sense” ilabi na sa confidential funds ug ang gipagawas usab nga datos sa COA.
Ingun man kabahin usab sa init nga hisgutanan sa pagwaldas sa bise presidente sa 125 million pesos sulod sa 10 ka adlaw, apan sukwahi kini sa gikabutyag ni Madriaga gumikan kay sulod sa 24 oras lang kini gihurot og waldas sa bise presidente.
Diin alang kang Cendaña nagpakita lamang kini sa kung unsang klaseha sa pagdumala sa bise presidente sa iyahang pagpanerbisyo, busa angayan lang gani nga ang maong milyones nga kantidad nga giwaldas sa bise presidente, angayan lang nga ibalik sa saktong panudlanan sa gobyerno.
