Posibleng mahimong pinakataas nga impeachment trial sa kasaysayan sa Pilipinas ang husay batok kang Vice President Sara Duterte, sumala ni Senate Secretary Renato Bantug.
Matud ni Bantug, ang banabana sa impeachment clerk of court nagpakita nga ang husay mahimong molungtad hangtod sa pito ka bulan kon sundon ang target nga iskedyul nga tulo ka adlaw matag semana.
Ang maong projection gibase sa 92 ka adlaw nga gihangyo sa House Prosecution Panel ug 30 ka adlaw nga gihangyo sa Defense Panel alang sa pagpresentar sa ilang mga ebidensya ug mga saksi.
Bisan pa, giingon ni Bantug nga posible nga mapamubo ang proseso kon mas daghang saksi ang mapresentar matag adlaw.
Kung matuman ang maong banabana, molabaw kini sa gidugayon sa impeachment trial ni kanhing Chief Justice Renato Corona niadtong 2012 nga milungtad og 44 ka adlaw, ug sa impeachment trial batok kang kanhing Presidente Joseph Estrada niadtong 2001 nga natapos sulod sa 23 ka adlaw.
Matud pa ni Bantug, giandam na sa impeachment court ang posibilidad sa usa ka taas nga husay, samtang gisiguro usab nga mapadayon sa Senado ang ubang mga katungdanan niini isip lehislatura, lakip ang paghimo ug pagrepaso sa mga balaod ug sa gisugyot nga nasudnong badyet alang sa sunod tuig.
