Gihatagan og katin-awan sa Bureau of Animal Industry sa Department of Agriculture (DA-BAI) nga dili maapektuhan ang agricultural trade sa Pilipinas human gipatuman sa China ang ban sa pag-angkat og binuhing baboy, wild boar, ug mga produktong baboy gikan sa nasud tungod sa hulga sa African Swine Fever (ASF).
Sumala sa ahensiya nga giila nila ang desisyon sa Chinese authorities apan gipasabot nga wala pa nag-export og buhing baboy, wild boar, ug mga produkto niini ang Pilipinas paingon sa China.
Basi sa taho, nagpagawas ang General Administration of Customs sa China og kamanduan nga nagdili sa pagsulod sa nasangpit nga mga produkto gikan sa Pilipinas tungod sa ASF concerns.
Sigon sa DA-BAI nga padayon ang Pilipinas sa pagpatuman sa hugot nga biosecurity measures lakip ang kontrol sa lihok sa hayop, culling o pagpatay sa mga naapektuhan, ug mas gipakusgan nga surveillance sa mga lugar nga dunay kaso o taas ang risgo.
Sumala sa ahensya, sukad nga unang matumbok ang ASF sa nasud niadtong 2019, nakatutok ang gobyerno sa mga lakang nga nahiuyon sa standards sa World Organisation for Animal Health (WOAH) aron mapug-ngan ug hingpit nga mawala ang sakit sa mga binuhing baboy.
