CEBU CITY-Hugot nga gihimakak sa inahan ni Simeon Cabutero kinsang usa sa gitumbok nga suspek sa pagpatay ni Rhea Mae Tocmo ang kalambigitan niini sa 19-anyos nga babae nga napalgang patay ug gisulod sa usa ka karton sa Brgy. Tisa ning Dakbayan.
Gi-asoy usab sa inahan sa suspetsado nga wala kini nakamatikod nga adunay bag-ong gihuptan nga smartphone ang iyahang anak ug gitino nga nakahibalo nalang siya mahitungod sa naasoy nga smartphone sa dihang nadakpan na sa kapolisan si Cabutero.
Gipaluyohan usab sa inahan sa suspetsado ang gibutyag niini nga igo lang kini nga gipabaligya sa smartphone sa biktima sa usa ka gihinganlan og “insik”, kinsang silingan lang nila apan dugang pa, nga dili manahigla ang duha sanglit wala ni niya makita nga magkauban.
Gibutyag usab sa inahan ni Cabutero nga makaila ang iyahang anak sa babaeng biktima.
Gitanggong sa kasamtangan si Roberto Gisman Gabison alyas ‘Insik’ sa Cebu City Police Office human kini nadakpan sa buy bust operation sa Sitio Kabulakan, Barangay Guadalupe ning syudad samtang gihuptan sa Labangon Police Station sa pagkakaron si Simeon Camangyan Cabutero kinsang nadakpan sa kapolisan atol sa ilahang pagresponde sa usa ka ‘armed person alarm’ sa Sitio Sampaguita, Barangay Guadalupe.
Samtang, bag-ohay lang nga gipaubos sa DNA testing sa mga kapulisan sa Dakbayan sila ni Gabison ug Cabutero sa ilahang pagpadayon og imbistigar sa kasong pagpatay sa 19-anyos nga si Rhea Mae Tocmo.
