Gipanghimakak sa inahan ni Simeon Gabutero Jr. ang bisan unsang kahibalo o kalambigitan sapagpatay kang Reah Mae Tocmo niadtong Hulyo 16, 2023.
Sa extra-judicial confession nga iyang gi-execute niadtong Huwebes, Agosto 17, niingon nga wala niya igkita si Tocmo dihang nibisita siya sa ilang boarding house sa Barangay Guadalupe, dakbayan sa Sugbo aron makigkita kang Gabutero.
Dugang pa, nga wala usab niya makita ang lawas ni Tocmo sulod sa lawak nga ilang gi-okupar.
Samtang iyang giangkon nga nakakita sa karton nga maoy gigamit ni Gabutero sa pagtago sa lawas ni Tocmo, apan wala niya masuta kung unsay sulod sa maong kahon.
Matud pa ni Police Major Angelito Valleser, hepe sa Labangon Police Station,nga ang unod sa extra judicial confession nga gipirmahan nga nihangyo si Gabutero kaniya ug sa ubang sakop sa ilang pamilya nga mobiya sa ilang boarding house sayo sa buntag niadtong Hulyo 16 aron mahatagan siya og pribasiya kay nagpaabot siya og bisita nga babaye.
Dugang pa, nga mga alas 5 sa kaadlawon niadtong adlawa, iyang gidala ang iyang 15 anyos nga anak ug ang usa ka tuig nga anak ni Gabutero sa usa ka kaliwat.
Paglabay sa usa ka oras, nibalik siya sa ilang boarding house aron maglung-ag alang sa ilang pamahaw.
Nanuktok kini sa pultahan sa lawak nga ilang gi-okupar alas 6 sa buntag.
Nakita niya nga nag-inusara si Gabutero niadto ug nagsingot.
Hinungdan nga nibiya na usab siya sa ilang boarding house human sa pamahaw alang sa iyang trabaho sa pagpanglaba ug sa iyang pagpauli alas 7 sa gabii sa samang adlaw, nakakita siyag karton sulod sa ilang lawak.
Iyang gipangutana si Gabutero kon para sa unsa kadto ug nitubag kini nga mga sinina ang sulod niini.
Pasado alas 10 sa gabii, nihangyo si Gabutero sa iyang manghud nga pakuyogon kay ihatod niya ang maong kahon, apan wala niya gisulti kung asa.
Ang mga pangangkon sa inahan gipamatud-an sa iyang 15-anyos nga anak sa extra-judicial confession nga gipirmahan usab niya niadtong Agosto 16.
Matud pa sa bata nga gihangyo siya ni Gabutero nga paubanon siya aron iyang magunitan ang karton sa ilang pagbiyahe.
