CEBU CITY- Gihulagway sa inahan sa batang gymnast nga si Aziz Jayden Diaz nga usa ka dakong milagro ug bunga sa dugay nga sakripisyo ang pagbulsa sa iyang anak og lima ka bulawang medalya sa nagpadayong Palarong Pambansa 2026.
Sa eksklusibong pakighinabi sa Bombo Newsteam, emosyonal nga gipaambit ni Juliet M. Diaz, inahan sa atleta, nga bata pa lang si Aziz nakitaan na kini og talagsaong potensyal human unang nadiskubrehan sa usa ka coach sa Catbalogan tungod sa iyang limpyo ug dretso nga cartwheel execution.
Ang maong talento maoy nagtukmod sa pamilya nga dad-on ang bata sa Sugbo aron mopaubos sa seryosong ensayo ubos sa paggiya ni Head Coach Joel Panugalinog sa Cebu Elite Gymnastics Club.
Matud sa inahan, bisan pa man sa kakapoy ug kahago sa adlaw-adlaw nga training schedule, ang determinasyon ug dakong gugma sa iyang anak sa maong sports ang nagtukmod niini nga mopadayon ug dili mosurender.
Si Diaz, kinsa usa ka Grade 3 student sa University of Southern Philippines Foundation (USPF) Elementary School, nahimo karong sentro sa atensyon sa nasyonal nga torneyo.
Sa edad nga siyam ka tuig, dili na bag-o si Aziz sa tam-is nga kadaugan tungod kay niadtong 2024, nakasungkit na kini og pito ka medalya sa kompetisyon sa Thailand lakip ang bronze medal sa Level 4 category, gawas pa sa nakuhang bronze sa Manila League.
Mas misidlak pa ang iyang ngalan niadtong 2025 human kini gikoronahang kampyon sa PGAA-STY International competition.
Sa pikas bahin, mibutyag usab ang batang gymnast nga kanunay siyang nag-ampo sa dili pa mosalmot sa matag kompetisyon.
Iyang giangkon nga ang iyang dakong inspirasyon mao ang Olympic gold medalist nga si Carlos Yulo, ug nangandoy kini nga masundan ang mga tunob niini aron makahatod og dugang dungog sa Pilipinas sa internasyonal nga entablado sa umaabot nga katuigan.
