CEBU CITY-Emosyonal si Leny Baguio, ang inahan sa hazing victim nga si Ronnel Baguio, human nga hingpit nang napasakaan ug kaso sa Cebu City Police Office (CCPO) ang pito ka mga suspek sa pagkamatay sa iyahang anak.
Nanawagan kini sa uban pang mga suspek ilabi na sa instructor niini nga musurindir na ug atubangon ang kaso nga gipasaka batok kanila.
Matud sa inahan nga dili lalim alang kaniya ang nahitabo isip inahan ug dili gayud niini madawat hangtud karun ang kamatayon sa iyahang anak.
Giingong gatuo kini nga adunay ikaduhang ginikanan ang iyahang anak dinhi sa Sugbo, apan mao naman hinuon ang nagtukmod nga musulod kini sa fraternity.
Sa pakighinabi sa Bombo Radyo Cebu kang Cebu City Police Office Director, Police Colonel Ireneo Dalogdog, gikumpirmar niini nga ilaha nang napasakaan ug kalapasan sa Republic Act 11053 o ang Anti-Hazing Act of 2018 ug kasong Homicide, ang mga mitahan nga suspek.
