CEBU CITY- Kasubo ang gibati sa inahan sa usa ka enhinyero human malakip ang iyang anak sa mga nabiktima sa pagkahun-ag sa Binaliw landfill niadtong Enero 8.
Tungod niini, nangayo siya og tabang pinaagi sa Public Attorney’s Office (PAO) Himamaylan, nga nakig-alayon sa Bombo Radyo Cebu.
Mao kini ang gipaambit ni Erlinda Deximo, inahan ni Engr. Fredrick Deximo, nga hangtod karon—usa na ka semana ang milabay—wala pa gihapon makaplagan ang iyang anak.
Atol sa ekslusibong pakighinabi sa Bombo Radyo Cebu newsteam kaniya, iyang gipaambit nga naglaom siya nga buhi pa ang iyanga anak niadtong Enero 9, apan pakyas kining masayran kung unsa na ang estado hangtud sa kasamtangan, hinungdan nga nagpangayo kini og tabang sa kadagkoan sa ilahang dapit, sa Isabela, Negros Occidental, aron abagan ang seach and rescue operation sa Binaliw.
Gihisgutan ni Erlinda nga ang iyahang anak nga si Fredrick dul-an tulo ka tuig na nga nanarbaho sa Prime Waste Solution Inc.isip usa ka Pollution Officer and Mechanical Engineer, ug anaa ra usab nagpuyo duol sa kung asa naka destino ang maong pasilidad.
Gani, gidugang niya nga si Fredrick aduna nay duha ka anak, lalaki, 12 ug ang babae, 11, nga siya ang nag-atiman karon kay nitaliwan naman sab ang asawa niini kaniadto.
Apan, gawas ni Erlinda isip usa ka inahan nga nagpangita sa anak, lakip usab ang mga anak ni Fredrick ang nagpangita sa presensya sa ilahang amahan matag uli nila gikan sa tunghaan.
Giasoy usab ni Erlinda nga niadtong Disyembre 21-29, 2025, gikuha ni Fredrick ang duha niya ka anak ug gidala sa Cebu aron mag Christmas Vacation, ug nibalik sa Isabela Negros pag petsa 30 sa susamang buwan, ug ni istar pa hangtud Enero 4 ning tuig si Fredrick subay sa pagsugat sa bag-ong tuig, human niuli pagbalik sa Cebu kay giingong nanawag ang supervisor niini nga adunay kinahanglang trabahoon.
Hangtud karon, naglaom gihapon si Erlinda nga makaplagang buhi ang iyahang anak, ug padayon ang iyahang salig ug pag-ampo sa labawng makagagahom.
