CEBU CITY — Nabalhog sa prisuhan ang usa ka inahan human nga gituohan gilumsan ang 11-months old niyang anak sa girentahang dormitoryo sa Brgy. Sto. Niño, sa dakbayan sa Sugbo.
Giila ang dinakpan nga si Kimmy Paclibar, 31 anyos, ug lumad nga taga-Misamis Occidental.
Base sa imbestigasyon, mibisita sa Sugbo mag-inahan kuyog sa iyang amahan aron patambalan ang bata sa usa ka albularyo.
Matud ni Police Senior Master Sergeant Alvin Itona sa Waterfront Police Station nga mibiya kadali ang 60-anyos nga amahan ni Paclibar aron mopalit og tubig.
Sa dihang mibalik ang amahan, nangita kini kung asa ang 11-months old niya nga apo.
Nakit-an na lang sa amahan nga giingong gilumsan sa inahan ang anak niini sulod sa comfort room.
Gidala ang maong bata sa labing duol nga tambalanan apan dead on arrival na kini.
Dugang pa ni Itona nga ila pang sayron kung nganong gituohang gilumsan sa inahan ang iyang anak.
Anaa na sa Waterfront Police Station ang inahan ug mag-atubang kini og kasong parricide.
