PROVINCE OF CEBU-Naglusad og imbestigasyon ang mga kapulisan sa Samboan Police Station ning habagatang bahin sa Sugbo kabahin sa kamatayon sa usa ka inahan ug anak nga giingong naghikog pinaagi sa hilo.
Human kini napalgang patay sulod sa ilang balay ang usa ka inahan ug singko anyos nga anak sa Brgy. Camburoy, lungsod sa Samboan niadtong Domingo, Hunyo 9.
Basi sa imbestigasyon sa Samboan Police Station nga gipangulohan ni Police Captain Analiza Sarte, adunay personal nga problema ang biktima hinungdan nga nahimo niini ang krimen sa kaugalingon ug sa iyang 5-anyos nga anak.
Gipaambit ni Police Captain Sarte nga ilang nakita ang suicide note usa ka makapatandog nga mensahe diin nanamilit ang biktima nga adunay mensahe sa mga kabanay niini.
Gitan-aw usab ang anggulo kon aduna bay foul play, apan sa pagsusi sa kapolisan, walay nakita ang mga awtoridad nga nagpunting sa pagpatay sa mga biktima.
Kumbinsido usab ang pamilya sa biktima nga nagkutlo ang inahan ug naluoy sa iyang anak tungod sa suwat nga nakit-an.
