Si Renato Ren-ren Llenes (orange tshirt)
CEBU CITY – Padayon nga gikumbinser karon sa kapulisan ang ginikanan ni Christine Lee Silawan nga mupirma sa complaint affidavit sa kaso nga ilang ipasaka batok sa 42 anyos nga self confessed killer sa ilang anak .
Matud ni Police Brigadier General Debold Sinas , ang Director sa PRO7 nga wala pa mipirma si Lourdes Silawan sa compalint affidavit batok kang Renato Llenes gumikan kay duna kini mga kondisyones nga gihatag sa kapulisan. Lakip sa kondisyon niini mao nga e apil ang 18 anyos nga si alyas Jun kinsang mao ang gitudlo nga prime suspek sa NBI-7 sa pagpatay kang Silawan. Apan matud ni Sinas nga dili mahimo nga ilang e apil si alyas Jun sanglit wala silay ebedensya nga gikuptan batok niini.
Gihimug-atan ni Sinas nga ang ilang kaso nga ipasaka karon ang base gayud lamang sa ebedensya nga ilang nahipos. Gawas na matud pa ang PNP kung unsa man unya ang desisyon sa piskal kabahin sa kaso nga gisang-at sa NBI kang alyas Jun.
Dugang pa ni Sinas nga gusto usab ni Lourdes nga ilakip sa kaso mao ang rape apan matud ni Sinas, base sa autopsy findings ni Dr Benjamin Lara, wala silay nakita nga indikasyon nga gipahimuslan ang biktima. Hinuon mahimo sila nga mu file og laing kaso nga attempted rape subay na usab sa pamahayag ni Llenes nga buot unta niini nga angkunon ang biktima apan wala mahinayon sanglit misukol kini kaniya.
Dako ang pagtuo sa kapulisan nga lig-on ang kaso nga ilang ipasaka batok sa self confessed killer ni Silawan hilabi na kung mugawas na ang resulta sa DNA test sa sinina niini nga nakuha sa kapulisan nga dunay mantsa sa dugo.
