CEBU – Nasikup sa mga sakup sa Provincial Intelligence Branch (PIB) ang usa ka incumbent barangay councilor sa dakbayan sa Talisay pinasikad sa usa ka search warrant. Giila ang dinakpan nga si Bimbo Cabuyno Ramos, incumbent councilor sa Lawaan III, dakbayan sa Talisay.
Gibutyag ni Police Capt. Alejandro Batobalonos, PIB Chief, nga dugay na nila nga gipaubus sa surveillance ang maong konsehal human giingung mugawas ang ngalan niini sa ilahang mga dinakpan sa nakalabay nga operasyon sa dakbayan.
Matud pa nga basi sa ilahang monitoring nahimung tagu-anan sa mga dagkung drug lords sa dakbayan ang panimalay ni Ramos hinungdan nga aduna silay mga operasyon nga dili gayud nila madakpan ang mga subject.
Gitawag ni Batobalonos si konsehal Ramos nga usa ka ‘bodegero’ sa number 1 drug lord sa probinsiya sa Sugbo kinsang naa na usa’y pending warrant of arrest.
Sigon pa nga ang maong drug lord ang supplier usab sa konsehal kung diin giingung himu-un pa ug stock room ang panimalay niini sa iligal nga drugas.
Nagkanayun si Batobalonos nga strategic area gayud ang nahimutangan sa panimalay sa konsehal ug gani aduna kini daghang ‘secret passage’, lakip na ang usa secret room, ingun man secret window, nga kaagi-an sa pag-eskapo.
Nakuha sa panimalay ni Ramos ang usa ka 22-Rifle nga airgun, CO2 gas tank, ug lima ka dagkung pakete sa shabu nga gibana-banang mutimbang ug dili mu menus 500 gramos ug mukabat sa dul-an 4 milyones ka pesos.
