ARGAO, CEBU-Patay ang usa ka Indian National samtang naangol ang kauban nga driver niini human nabangga ang ilang gisakyan nga motorsiklo sa usa ka mi-overtake nga Provincial Vus sa National Highway sa Barangay Langtad, lungsod sa Argao sa habagatang Sugbo pasado alas 3:43 sa hapon sa adlawng Domingo, Marso 30, 2025.
Nailhan ang biktima nga si Kumar Kuldip, 51-anyos, usa ka Indian National, ug residente sa Brgy. Tulic, lungsod sa Argao.
Samtang daling gidala sa Carcar District Hospital ang naangol nga driver sa iyang gisakyan nga motorsiklo nga si Surjit Suman, 45-anyos, Indian National, ug residente sa susamang barangay.
Laing nalambigit sa maong aksidente ang live-in-partner ni Suman nga si Analisa Gonzaga Narbasa, 39-anyos, nga maoy nagmaneho sa laing nga motorsiklo.
Samtang, ang Provincial Bus nga gimaneho ni Fernando Sarno Malabago Jr., 36-anyos ug lumad nga taga Brgy Linuthangan, Canlaon City, Negros Oriental.
Base sa initial nga impormasyon nga nahipos sa kapulisan sa lungsod sa Argao ug sa eksklusibong nahinabi nga saksi sa Bombo Radyo Cebu nga si Calimer Largo nga nasayrang samtang nagbyahe pa-habagatang bahin sa Sugbo ang duha ka motorsiklo nga gimaneho ni Suman ug ni Narbasa, gikataho nga misulay sa pag-overtake ang bus nga gimaneho ni Malabago, hinungdan sa pagkawala ug kontrol ni Suman sa iyang motorsiklo og natumba kini inubanan sa angkas niini nga si Kuldip, nga maoy nalabay ug naguyod sa ligid sa provincial bus ang biktima nga si Kuldip sa gilay-on nga gibana-banang 40 ft, hinungdan sa hinanaling kamatayon niini.
Gikataho pud sa Argao PNP nga sa wala pa nahitabo ang disgrasya, ang parehong driver sa motorsiklo nagtabi samtang nagdrive sa National Highway.
Daling miresponde ang Argao MDRRMO ug gidala ang biktima nga si Kumar Kuldip sa Isidro Kintanar Memorial Hospital diin didto gideklarar nga dead-on-arrival.
Kasamtangan karong nakatanggong sa Argao Police Station ang driver sa provincial bus samtang ang kaubang driver sa motorsiklo nga si Analisa Gonzaga Narbasa padayong gi-imbestigaran sa kapulisan.
