Mitala og 6.0 % ang overall inflation rate sa Central Visayas niadtong buwan sa Pebrero 2026, ug kini mas taas kumpara sa 5.6 % nga natala niadtong Enero 2026, ingun man nga mas dako usab kini kumpara sa 2.9 % nga inflation nga narehistro sa susama nga bulan sa 2025.
Sumala sa datos sa Philippine Statistics Authority Region 7 (PSA-7), ang pagtaas sa presyo sa Food and Non-Alcoholic Beverages mao ang nag-unang hinungdan sa pagsaka sa inflation sa rehiyon, diin nirehistro kini og 9.3 % nga inflation sa Pebrero gikan sa 8.2 % niadtong Enero 2026.
Samtang sa mga major commodity groups, ang Food and Non-Alcoholic Beverages gihapon ang adunay pinakadakong kontribusyon sa inflation rate nga 3.70 percentage points.
Gisundan kini sa Housing, Water, Electricity, Gas, and Other Fuels nga may 0.90 percentage point nga kontribusyon ug 4.1 % nga inflation, samtang ang ikatulo sa may dakong kontribusyon mao ang Restaurants and Accommodation Services, nga nakatampo og 0.86 percentage point sa inflation ug adunay 9.7 % nga inflation rate.
Samtang, misaka usab ang food inflation sa rehiyon ngadto sa 9.8 % sa Pebrero 2026 gikan sa 8.7 porsyento niadtong Enero 2026.
Subay niini, ang nag-unang nakaapekto sa pagtaas sa food inflation mao ang kusog nga pagsaka sa presyo sa mga utanon, tubers, plantains, cooking bananas ug pulses, nga misaka ngadto sa 53.5 % gikan sa 43.9 %.
Misunod usab ang Cereals and Cereal Products, nga nisaka sa 1.4 % nga inflation kumpara sa 0.1 % sa miaging bulan.
Sa pikas nga bahin, misaka usab sa 6.9 % ang inflation rate alang sa Bottom 30 percent income households sa Central Visayas niadtong Pebrero 2026, gikan sa 6.1 % nga natala niadtong Enero 2026.
Sumala sa datos, ang pagsaka sa inflation sa ubos nga sektor sa kita sa mga panimalay nag-una tungod sa pagtaas sa presyo sa Food and Non-Alcoholic Beverages.
Kini nga commodity group mirehistro og 10.0 % nga inflation sa Pebrero 2026, mas taas kumpara sa 8.2 % nga natala niadtong Enero 2026, diin nagpasabot kini nga mas nabug-atan sa pagsaka sa presyo sa pagkaon ang mga panimalay nga kabahin sa pinakaubos nga 30 % sa kita sa rehiyon.
