CEBU – Padayong nisaka ang inflation , usa ka pagsukod sa kinatibuk-ang pagsaka sa presyo sa mga palaliton ug serbisyo sa Central Visayas, sulod lang sa lima ka sunod-sunod nga buwan.
Nitaho ang Philippine Statistics Authority dinhi (PSA-7) nga niabot sa 8.1 porsyento niadtong Septiyembre 2022 ang inflation rate sa rehiyon.
Kini ang labing taas nga inflation rate nga ilang natala sukad niadtong Oktubre 2018.
Sama sa trend sa national level, misaka ang inflation sa Central Visayas ngadto sa 8.1 porsyento sa Septiyembre 2022, gikan sa 7.4 porsyento sa Agosto 2022.
Gitumbok sa mga state statisticians nga ang padayon nga pagsaka sa galasto-an sa balay, tubig, elektrisidad, gas, ug uban pang mga fuel maoy nag-unang hinungdan sa kinatas-ang inflation rate sa Central Visayas.
