CEBU CITY-Gihingusgan sa Cebu City Police Office (CCPO) ang intensive police operations ug proactive crime prevention measures nga nakatabang sa pagpakunhod sa crime rate sa siyudad, base sa comparative analysis sa crime statistics sa milabayng mga buwan.
Usa sa gihingusgan nga kampanya mao ang batok sa ilegal nga drugas, nga niresulta sa pagkasakmit sa P1.4 kilos nga shabu nga nagkantidad og P9.5 milyones, alang sa Septiyembre ning tuiga.
Dugang pa, nga 143 niini nga anti-illegal drug operations misangpot sa pagkasikop sa 168 ka drug personalities.
Sa pakigbatok sa dili lisensyadong mga armas sa samang buwan, ang CCPO nakasakmit og 19 ka loose gun ug usa ka explosive device ug naka-collar sa 16 ka tawo.
Samtang sa ilegal nga sugal, ang CCPO nihimo og 207 ka operasyon, nga nisangpot sa pagkasikop sa 390 ka tawo ug nasakmit ang P26,399 nga bet money.
Sa laing bahin, ang kampanya batok sa mga wanted nga nakakita sa CCPO nga naglunsad og 1,554 ka mga operasyon nakakuha og 75 ka mga tawo nga adunay warrant of arrest, siyam niini anaa sa most wanted persons list.
