CEBU CITY – Gipahibalo ni Cebu City Mayor Edgardo Labella ang maayong balita alang sa mga senior citizens atol sa programa sa International Women’s Day karong adlawa.
Gibutyag ni Mayor Labella nga adunay 14 ka mga private firms nga ilang gisabot kalabot sa paghatag og trabaho sa mga senior citizens diin aduna na’y usa niini ang ni-commit sa maong plano.
Kini langkuban sa mga fastfood chains diin hatagan og upat ka oras ang mga senior citizens nga motrabaho. Lakip sa shifting niini ang alas 8 sa buntag ngadto na sa alas 12 sa udto og ala 1 ngadto na sa alas 5 sa hapon.
Hinuon una makatrabaho matod sa mayor kinahanglan una nga ipaubos sa physical examination ang mga mo-apply aron masiguro nga anaa kini sa kondisyon nga motrabaho.
Kahinumduman nga usa ka resolusyon ang naumol gikan sa buhatan ni konsehal Niña Mabatid og gihimo na usab ang maong pahibalo sa Department of Manpower Development and Placement pinaagi sa head niini nga si Shiela Mae Daluz diin suportado ang maong lakang sa buhatan sa Office for Senior Citizen’s Affairs.
Nahimong basehan sa maong lakang ang mga senior citizens sa nasod Singapore diin nagtrabaho ang pipila niini sa mga fastfood. Lakip sa trabaho ang paghipos sa kinan-an sa mga customers.
Samtang gikalipay sa mga ginikanan ang dugang pahibalo ni Mayor Labella kalabot sa libre nga school supplies, sapatos, uniform, school bags og ang libreng feeding program sa mga kabataan sa kindergarten og elementary level.
Gibutyag ni Mayor Labella nga kini ang unang higayon sa kasaysayan sa dakbayan sa Sugbo nga adunay madawat nga libreng uniforms ang mga magtutungha.
Subay niini, gitataw ni Labella nga wala na’y rason nga dili maka eskwela ang mga kabataan hangtod sa elementarya.
Nanawagan usab ang mayor sa mga ginikanan nga dili mo-abuso og likayan nga magdaghan ang anak aron dili maglisod sa pag-atiman niini.
Samtang gipasalamatan sa opisyal ang konseho sa syudad lakip na ang bise mayor niini nga si Vice Mayor Michael Rama og gi-congratulate usab niini ang women’s commission atol sa programa sa mga kababayen-an karong adlawa subay sa International Women’s Day.
