Nasikop sa mga operatiba sa Bureau of Immigration-Central Visayas (BI-7) ang usa ka Intsik nga gikatahong nagpakaaron-ingnon nga Pinoy.
Ang pagkasikop sa maong langyaw, diin ang operasyon nga gihimo subay kini sa direktiba ni Presidente Ferdinand R. Marcos Jr. nga protektahan ang soberanya sa nasud batok sa mga langyaw nga nagpahigayon og ilegal nga kalihokan.
Sa pikas bahin, gipaambit usab ni Bureau of Immigration Commissioner, Joel Anthony Viado, nga ang pagkasikop ni Wang Chaoxin, 32, niadtong Mayo 14, gikatahong nagdumala siya sa usa ka trading company ug nagpaila sa iyang kaugalingon nga usa ka Filipino.
Busa, si Wang, gidakop uban sa upat ka kaubang Intsik, kinsa nakit-an nga nakalapas sa mga kondisyon sa ilang pagpuyo.
Dugang niana, tulo sa mga grupo ang naghupot og working visa, apan nasuta nga nagtrabaho sa usa ka kompanya gawas sa ilang gideklarar nga amo, samtang ang usa nasuta nga nagtrabaho nga walay permit.
Subay niana, ang operasyon gilusad inubanan sa Armed Forces of the Philippines ug National Bureau of Investigation Cebu ug Manila.
Sa pikas bahin, matud ni Viado, nga iyahang gi-isyu ang mission order human makadawat og impormasyon gikan sa military intelligence operatives nga si Wang migamit og peke nga pagkatawo, diin, nakakuhan siyag Philippine driver’s license, birth certificate ug nagparehistro sa iyang kompanya ubos sa iyang gituohang Filipino nga ngalan.(Bombo Irene Ardiente)
