Gisupak sa gobyerno sa Iran ang padayon nga pagpalig-on sa presensya militar sa United States sa Middle East, samtang nagkagrabe ang tensyon tali sa duha ka nasud.
Sa pahayag ni Iranian Foreign Minister Abbas Araghchi, giingon niya nga ang gubat dili solusyon sa paningkamot sa Washington nga hingpit nga mapahunong ang programa sa nukleyar sa Iran.
Matud pa niya, diplomasya ug seryosong negosasyon ang angayan nga unahon imbes nga militar nga presyur.
Gikondena usab ni Araghchi ang pagdeploy sa mga barkong iggugubat sa US sa kadagatan duol sa Iran, nga iyang gihulagway nga dili makatampo sa pagpaubos sa tensyon ug walay positibong resulta.
Samtang, nagpasidaan siya sa mga posibleng mga airstrike, nga kini dili makahatag og kaayohan sa bisan unsang habig og lagmit mosangpot sa daghang kaswalti.
Kahinumduman nga si US Pres. Donald Trump naghatag og 10 ka adlaw nga ultimatum sa Iran aron motubag sa mga panagsulti nga nagtumong sa hingpit nga pagwagtang sa nuclear program niini.
Ang nagpadayon nga tensyon nagpasamot sa kahadlok sa posibleng eskalasyon sa rehiyon kon dili masulbad pinaagi sa diplomasya.
