Nagpasidaan ang Islamic Revolutionary Guard Corps nga posible nilang targeton ang daghang dagkong kompanya sa US nga nag-operate sa Middle East.
Sumala sa usa ka pahayag nga gipagawas sa grupo, 18 ka kompanya lakip ang Apple, Microsoft, Google, ug Nvidia ang giisip nga “lehitimong target” isip panimalos sa giingong pag-atake sa US ug Israel sa Iran.
Nagpasidaan usab ang grupo nga ang mga pag-atake mahimong magsugod sa ilang gitakdang oras ug giawhag ang mga empleyado sa mga kompanya nga mobakwit aron masiguro ang ilang kaluwasan.
Ang ubang dagkong kompanya sa teknolohiya sama sa Intel, Oracle, IBM, Dell, Tesla, ug Boeing anaa usab sa listahan.
Sa usa ka lahi nga pahayag, usa ka representante sa Intel miingon nga ilang giuna ang kaluwasan sa ilang mga empleyado ug nga padayon nilang gibantayan ang sitwasyon sa rehiyon.
Sumala sa Healix CEO sa risk management firm nga si James Henderson, siya miingon nga kini nga klase sa hulga dili bag-o ug ang pag-target sa mga kompanya sa teknolohiya sama sa mga data center ug cloud system nahimong bahin sa modernong gubat.
Gikataho kaniadto nga ang Iran nakaigo sa daghang mga data center sa Middle East, nga hinungdan sa mga pagkabalda sa mga digital nga serbisyo sa United Arab Emirates (UAE).
Niining bahina, ang gubat sa rehiyon nagpadayon pa human sa hiniusang operasyon militar sa U.S. ug Israel niadtong Pebrero 28, nga nakaaghat sa pagbalos sa Iran.
Liboan ka mga missile ug drone ang gitaho nga gilunsad sa lainlaing mga nasud sa Middle East.
Samtang, si U.S. President Donald Trump masaligon nga ang pwersa militar sa U.S. makabiya sa Iran sulod sa duha ngadto sa tulo ka semana, samtang gikatakda siyang mohatag og pahayag sa Miyerkules sa gabii (oras sa Amerika) bahin sa gubat.
