Naglusad ang militar sa Estados Unidos og bag-ong mga pag-atake sa habagatang bahin sa Iran, diin target ang mga Iranian missile sites ug mga sakayan nga nagtinguha sa pagbutang og mga mina sa dagat.
Matud sa US Central Command (CENTCOM), gihimo ang mga pag-atake isip depensa sa kaugalingon ug aron maprotektahan ang ilang mga sundalo batok sa hulga gikan sa pwersa sa Iran.
Sumala ni Capt. Tim Hawkins, tigpamaba sa Central Command, magpadayon ang militar sa US sa pagdepensa sa ilang mga sakop samtang nagpabilin ang kakalma taliwala sa nagtunhay nga ceasefire.
Giklaro sa opisyal nga ang mga strike gitumong sa mga lokasyon duol sa Bandar Abbas, usa ka port city sa habagatan sa Iran diin nahimutang ang dakong naval base sa Strait of Hormuz.
Sa pagkakaron, wala pa’y opisyal nga tubag ang gobyerno sa Iran bahin sa insidente ug wala pa usa’y klaro kung unsa ang epekto niini sa kasamtangang peace agreement sa duha ka nasud.
Niadtong weekend, gipahibalo ni US President Donald Trump nga hapit na makab-ot ang usa ka kasabutan, hangtud nga iyang gibutyag nga gisugo niya ang mga negosyador nga dili dali-dalion ang proseso.
