CEBU CITY-Dako ug epekto sa ekonomiya sa mga nasud nga susama sa Pilipinas kung ugaling mutumaw ang military conflict sa Iran ug Estados Unidos.
Napanglantawan ni Dr. Ryan Maboloc, Ateneo De Davao Political Science Professor, nga dili malakip sa gubat tali sa duha ka nasud ang mga ‘dependent countries’ apan apektado gayud ang ekonomiya niini.
Sigon ni Maboloc sa pakighinabi sa Bombo Radyo Cebu nga 70% sa ekonomiya lukop kalibotan ang gipadagan pinaagi sa lana hinungdan nga mutibugsok gayud kini kung ugaling mapadayon ang military conflict sa Iran ug Estados Unidos. Lakip sa maapektohan ang Pilipinas kung diin nagsalig sa lana nga gikan sa Middle East.
Kung ugaling adunay gubat nga mahitabo sa duha ka nasud giingong apektado gayud niini ang Middle East lakip na ang Saudi Arabia kung diin posibling maapektohan usab ang ilahang mga oil facilities.
Gawas sa lana, giingong maapektohan gayud ang panginabuhi-an sa mga Overseas Filipino Workers (OFWs) kung diin daghan niini ang mapa-uli dinhi sa Pilipinas arun nga dili madamay sa kagubot.
Dugang pa, mutaas usab ang interest rate sa world market sa ilahang loan nga itanyag ngadto sa mga nasud nga apektado kung ugaling adunay gubat.
Hinuon, giklaro ni Maboloc nga sa pagkakarun layo pa ang posibilidad nga atakihon gayud sa Estados Unidos ang Iran gumikan kay wala pa kini muladlad sa klarong katuyoan sa pag-atake niini.
