CEBU CITY – “All set” na ang Ironman 70.3 Asia-Pacific Championship nga ipahigayon sa syudad sa Lapu-Lapu ugma sa usa ka 5-star hotel.
Nagkanayon ang Ironman founder nga si Wilfred Steven Uytengsu nga siguraduhon sa gobyerno apil ang pribadong sektor nga magmalampuson ang sporting event tungod sa pagtinabangay sa lain-laing local government units nga gipanguluhan ni Lapu-Lapu City Mayor Paz Radaza.
Pagasalmutan kining triathlon event sa dul-an 3,000 triathletes gikan sa 52 ka nasud.
Nasayran usab nga ang iladong Cebuano designer nga si Kennerth Cobonpue ang mohimo sa mga tropeyo ug mga medalya nga ihatag alang sa tanang finishers.
Sa pikas nga bahin, sulod sa Mandaue City ug Lapu-Lapu City lang ang ruta sa triathlon karong tuiga sanglit wala misugot si Cebu City Mayor Tomas Osmeña kay magmugna kini og problema sa trapiko.
Samtang gikalipay usab sa Department of Tourism – VII Regional Director nga si Shalimar Hofer Tamano tungod kay makatabang ang Ironman aron pakusgan ang “sports tourism” sa nasud.
Nasayran nga napulo na ka tuig gipahigayon ang Ironman 70.3 dinhi sa Cebu.