Giguba sa Israel Defense Forces (IDF) ang mga imprastraktura ug underground tunnel network sa grupong Hezbollah nga nahimutang sa Ali al-Taher ridge sa habagatang bahin sa Lebanon, subay sa paningkamot nga mapalig-on ang gihimo niining security zone sa maong dapit.
Sa usa ka hiniusa nga pahayag, gipadayag ni Prime Minister Benjamin Netanyahu ug Defense Minister Israel Katz, nga magpabilin ang mga pwersa sa Israel sa maong rehiyon aron mapugngan ang pagpundok ug pagpalig-on pag-usab sa gahum sa Hezbollah.
Sumala sa militar sa Israel, nakuha nila ang kontrol sa usa ka network sa mga tunel nga nagsangkad og sobra sa duha ka kilometro, nga nagtipig sa mga rocket, missile, drone, ug uban pang kagamitan sa militar nga iya sa Badr unit sa Hezbollah.
Tungod sa gipahigayong mga operasyon, nabati ang kusog nga mga pagbuto sa rehiyon sa Nabatieh samtang nagpadayon ang mga operasyon, bisan pa sa kasabutan sa ceasefire nga naabot niadtong Hunyo.
Kahinumdoman nga sukad pa niadtong tuig 2023, nagsugod na ang Israel sa pagpahimutang sa ilang mga estratehikong posisyon sa habagatang Lebanon aron magsilbing buffer zone batok sa mga hulga sa seguridad gikan sa Hezbollah.
