Giguba sa militar sa Israel ang usa ka underground tunnel nga giingong gigamit sa militanteng grupo nga Hezbollah sa habagatong Lebanon, duha ka adlaw human sa bag-ong security arrangement tali sa Israel ug Lebanon.
Sumala sa hiniusang pahayag ni Israeli Prime Minister Benjamin Netanyahu ug Defense Minister Israel Katz, ang gi-target nga tunnel sa lungsod sa Majdal Zoun adunay gitas-on nga 200 metros ug giingong tipiganan sa gatusan ka mga armas ug rocket launchers.
Giingon sa Israel nga gipahibalo nila daan ang Estados Unidos sa wala pa ipatuman ang operasyon.
Nahitabo ang airstrike duha ka adlaw human nagkauyon ang Israel ug Lebanon sa usa ka US-brokered security arrangement nga nagtumong sa pagpahunong sa panagbangi sa utlanan.
Tungod sa nagpadayon nga panagbangi, kapin sa usa ka milyon ka mga residente sa Lebanon ang namakwit gikan sa ilang mga panimalay.
Samtang, ang Hezbollah ug Iran nag-ingon nga misaad ang Estados Unidos nga motabang sa pagpasig-uli sa kalinaw sa Lebanon isip kabahin sa memorandum of understanding nga gipirmahan aron malikayan ang mas lapad nga panagbangi sa rehiyon.
