Nagkasabot ang Israel ug ang grupo sa Hezbollah sa usa ka ceasefire sa Lebanon niadtong Biyernes, sumala sa usa ka opisyal sa Estados Unidos, human sa bag-ong pag-usbaw sa mga panagbangi nga naghulga sa mas lapad nga mga paningkamot alang sa kalinaw sa Middle East.
Ang opisyal, nga misulti ubos sa kondisyon nga dili ipadayag ang iyang identidad, miingon nga ang ceasefire misugod alas 4:00 sa hapon sa Lebanon.
Matod pa niya, ang mga negosyador gikan sa Estados Unidos ug Qatar adunay dakong papel sa pagpatigbabaw sa kasabutan, uban sa tabang sa Iran.
Sa wala pa maabot ang kasabutan, misamot pag-usab ang panagsangka tali sa duha ka kilid.
Sumala sa mga taho, 18 ka tawo ang namatay sa mga airstrike sa Lebanon, samtang upat ka sundalong Israeli ang namatay sa mga opensiba sa Hezbollah.
Ang nagkataas nga tensyon sa Lebanon misangpot usab sa pagkansela sa gikatakdang panagsultihanay tali sa Estados Unidos ug Iran sa Switzerland niadtong Biyernes.
Dugang pa, nga ang mga panagsultihanay giisip nga hinungdanon aron masiguro ang pag-abli pag-usab sa Strait of Hormuz, usa ka kritikal nga agianan alang sa pangkalibutang pamatigayon sa lana ug uban pang mga produkto.
Usa ka senior nga magbabalaod sa Hezbollah miingon nga gipahibalo sa Iran ang grupo nga ang mga panagsultihanay uban sa Estados Unidos dili makapadayon kon wala’y komprehensibong ceasefire sa Lebanon.
Samtang, ang tigpamaba sa Foreign Ministry sa Iran wala direktang mihisgot sa gikanselang panagsultihanay sa Switzerland, apan iyang giingon nga ang Estados Unidos adunay direktang responsibilidad sa mga pag-atake sa Israel sa Lebanon.
Dugang pa sa Tehran nga andam kini sa paghimo sa tanang gikinahanglang lakang aron mapanalipdan ang iyang nasudnong interes.
