Nitumaw ang usa ka isyu kabahin na usa ka pari nga giingong managmal og iro nga mosulod sa simabahan, ilabi na atol sa iyahang homiliya, diin sa maong hisgutanan, naabot na kini sa buhatan sa Department of Veterinary Medicine and Fisheries (DVMF).
Busa, personal nga gikuha sa Bombo Radyo Cebu team ang pamahayag ni Dr. Alice Utlang kinsa ang pangu sa DVMF, kabahin na niini.
Gikabutyag ni Dr. Utlang nga taud-taud na siya nakadawat og mga estorya kabahin sa pari sa usa ka barangay sa Dakbayan sa Sugbo, nga giingong mamunal sa kahayupan, ug dili mo padayun sa iyahag misa kung ang iro anaa pa sulod sa simbahan, ug suguon ang mga sacristan niini nga pang abogon pagawas ang iro.
Dugang niya nga aduna siyay nadawat nga mga taho nga adunay pagkangil-aron sa asta kining maong pari, diin Nakita niya nga dili maayong ehemplo, ug dili susama sa iyahang Nakita nga usa ka pari nga nag-atiman, nagpakaon,naghatag og kapuy-an sa mga iro kinsa gihulagway ni Dr. Utlang nga maoy angay nga sundon.
Subay niini, gipahayag ni Dr. Utlang nga kung makadawat pa gyud siya og bisan usa na lang ka susamang reklamo, iya na gyud kining pa-isyuhan og citation ticket ug direkta nga ireklamo dili lang sa barangay kapitan, apan lakip na usab kang Cebu Archbishop Alberto Uy, nga nagpakita sa iyang kaseryoso sa pagsulbad sa isyu.
Sa maong panghitabo, nagsilbi usab kini nga pahinumdom nga subay sa Animal Welfare Act sa nasod, ang mga indibidwal nga mudagmal sa hayop sama sa iro, mahimong multahan ug mabilanggo.
