CEBU CITY — Kung hisgutan ang mga santos ug santas sa langit, mahuna-hunaan nato ang ilang angelic ug simple nga imahe.
Apan sa talagsaong higayon, gikatakdang himoong santo ang usa ka Italian teenager kinsang nihatag sa iyang kinabuhi alang sa Ginoo.
Sukwahi sa naandan, makakita gayud ang tanang mga Katoliko og santo nga naka-jacket with jeans and sneakers, nga sama sa common nga teenagers.
Una nang na-aprubahan ni Pope Francis ang beatification ni Carlo Acutis niadtong Pebrero ug gikatakda kining ideklarar isip “blessed” karong Oktubre 10.
Kini human nga giila sa Vatican ang milagro human nga naayo ang usa ka batang Brazilian kinsang naayo sa congenital disease sa iyang pancreas gamit ang pag-ampo ngadto sa ulit-tawo nga si Acutis.
Sa pagkakaron, nahimutang ang patay’ng lawas ni Acutis sa Church of Santa Maria Maggiore sa Assisi, Italy diin halos wala kini madugta ug nagpabilin ang mala-anghel nga imahe niini.
Nagdako si Carlo Acutis ning modernong panahon ug gipahimuslan ang panahon niini sa pag-ampo ug pag-alagad ngadto sa Ginoo pinaagi sa pagsimba, pagrosaryo, ug pagtahud sa balaang lawas ni Kristo sa tabernakulo.
Apan game usab kini sa uban pang mga bata-on sama lang sa pagduwa og football, pagduwa sa mga gadgets, ug modern technology.
Nitaliwan si Acutis niadtong 2006 sa edad nga 15 anyos gumikan sa sakit nga leukemia apan nagkanayon kini nga napahimuslan niini ang panahon kauban ang Ginoo.
Mamahimo kining “santo sa modernong tekonolohiya” kung makahimo si Acutis og duha ka milagro pinaagi sa intercession niini. /Catholic News Agency/gn
