CEBU CITY- Natanggong sa prisohan ang usa ka Japanese national nga gipasanginlan sa pag-kidnap ug paglugos sa usa ka 17-anyos nga menor de edad nga iyang nakaila pinaagi sa online.
Giila ang suspek sa alyas “NATSUKI,” 19 anyos, ulitawo, lumad nga taga Tokyo, Japan, apan kasamtangang nanimuyo sa usa ka condominium unit sa Barangay Mabolo, Cebu City, diin didto usab gituohang nahitabo ang giingong krimen.
Sumala sa imbestigasyon sa kapulisan, gidani sa suspek ang biktima, residente sa Barangay Mantuyong, Mandaue City, nga muadto sa iyang giabangan nga condominium pasado alas 9:00 sa gabii niadtong Lunes, Disyembre 28.
Giingong buot na untang mopauli ang biktima apan wala kini tugoti sa suspek, nga miresulta sa giingong paglugos. Gituohang gipasaligan pa sa suspek ang biktima nga pakaslan siya.
Nasuta sa mga ginikanan sa biktima ang lokasyon sa condominium diin nagpuyo ang suspek, hinungdan nga nangayo sila og tabang sa mga guwardiya sa mao nga building. Didto gihimo ang citizen’s arrest sa suspek ug dayon giturn-over sa Mabolo Police Station.
Mag-atubang og kasong kidnapping with rape ang suspek. Samtang, gipaabot pa sa mga awtoridad ang resulta sa medico-legal examination aron mapalig-on ang ebidensya batok kaniya.
