Luyo sa matag malamposong topnotcher mao ang usa ka estorya sa grabeng sakripisyo, apan alang sa bag-ong nanguna sa nasod sa Licensure Examination for Teachers (LET), ang iyang kadaugan produkto sa dungan nga pagdala sa iyang mga pangandoy ug sa mga sakripisyo sa iyang pamilya.
Si Jhade Vine Icot, lumad nga taga Tayud, Liloan, Cebu ug gradwado sa Cebu Technological University (CTU) – Danao Campus, maoy opisyal nga miguwas nga Top 1 sa bag-ohay lang nga LET human makakuha og talagsaong rating nga 95 porsyento.
Sa pakighinabi sa Bombo Newsteam, gipaambit niini nga wala siya magdahom nga siya ang manguna sa tibuok nasod ug dili siya ang unang nakahibalo sa maong maayong balita. Nasayran lamang niya kini human siya tawgan sa iyang mga propesor ug mga opisyal sa CTU aron pahibaluon nga nakasulod siya sa listahan sa mga topnotchers.
Giila sa bag-ong magtutudlo nga ang iyang kalampusan dili lamang iyaha, kondili dako og papel ang iyang pamilya, ilabi na ang iyang inahan kinsa ningsakripisyo nga manarbaho sa laing nasod aron lamang masiguro nga makatapos sila sa pag-eskwela.
Gawas sa pamilya, gipasidunggan usab ni Icot ang iyang mga propesor sa CTU-Danao kinsa wala mapul-an sa pag-aghat ug pagdasig kaniya nga mangandoy og dako ug motuo nga dako og tsansa nga mamahimo siyang topnotcher.
Dili ordinaryo ang giagian ni Icot sa iyang pagpangandam sa board exam. Isip usa ka working student, gikinahanglan niya ang grabeng disiplina sa pagdumala sa oras. Gilimitahan niya ang paglaag, gisakripisyo ang saktong katulog, ug uban pang mga personal nga kalihokan aron lamang makatutok sa iyang review.
Bisan pa man niini, gipaningkamutan gihapon niya nga balansehon ang iyang panglawas pinaagi sa pagtuon sulod sa tulo hangtod lima ka oras matag adlaw aron malikayan ang pagkasakit.
Giangkon ni Icot nga aduna gihapoy mga higayon nga bation niya ang grabeng kakapoy ug tinguha nga moundang, apan ang pag-ampo ug ang inspirasyon gikan sa iyang pamilya ug mga magtutudlo ang kanunay nga nagpukaw kaniya aron magpadayon.
Alang sa mga nag-andam ug mokuhaay pa lamang sa board exams, nagbilin si Icot og usa ka madasigon nga mensahe nga nagpahinumdom kanila sa kamahinungdanon sa paglahutay.
