Maglisud pagdawat sa wala damhang panghitabo ang pipila ka mga katrabaho sa 45 anyos, nga si Elmer Himaya Abad, kini human nga nakuryentihan alas 3:00 sa kadlawn sa ilahang trabahoan nga usa ka mall sa Bgry. Mambaling ning Dakbayan sa Sugbo.
Si Elmer kinsa taga Giloctog, Barili, Cebu ug usa ka electrician sa kompanyang Hardrock Cont & Painting Contractor Corp, diin usa na ka semana kini nga nagtrabaho isip electrician ug sugod iyang trabaho sa alas 10:00 sa gabii hangtud na sa alas 5:00 sa buntag.
Naasoy usab nga si Elmer nikatkat kini sa hagdan ug adunay usa ka live wire ang giputol hinungdan nga nabag-id ang putol nga wire sa puthaw ingun man sa lawas sa biktima nga maoy rason nga nakabsan kini og kinabuhi.
Dugang pa, dead on the spot ang maong biktima kay sa dihang na kurentehan kini, natagak usab kini sa hagdan nga gisak-an niini, bisan paman nga nakasuot sa PPE o personal protective equipment niini, mao nga ang mga katrabaho niini maglisud sila pagdawat sa maong panghitabo.
Subay niini, nipagawas usab og pamahayag si Albert Villaester, katrabaho ug pag-umangkon sa maong biktima atol sa pakighinabi sa Bombo Radyo Cebu team kaniya diin iyahang naasoy nga wala siyay kasayuran nga nikatkat ang biktima ug nagputol og live wire.
Dugang usab niini nga anaa sulod sa duha ka semana palang siyang gatrabaho sa maong mall, samtang ang uyuan niini nga si Elmer usa ka semana palang isip mga electrician.
