LAPU-LAPU CITY – Nanawagan si Lapu-Lapu City Mayor Junard ‘Ahong’ Chan sa publiko nga hunungon na ang pagpakatap ug ‘fake news’ kalabot sa giingong pagpangulata sa mga pulis sa mga sakop sa Alpha Kappa Rho.
Gibutyag ni Mayor Chan nga na-isturya na niini ang duha ka habig arun nga iyahang mapaminaw ang ilahang tagsa-tagsa ka mga bersyon ug giingong igo lang gayud kini nga magpatunga ug nanghinaut nga ma-settle lang ang tanan.
Kini ang panghinaut sa mayor subay na sa kapistahan sa Birhen sa Regla sa dakbayan.
Matud pa sa opisyal nga dili kini gusto ug kagubot sa iyahang dakbayan ug unta tahuron sa tanan ang kabalaan sa okasyon.
Sigon pa niini nga dili kini gusto nga mudako pa ang away hinungdan nga nanawagan kini nga hunungon na ang pagbinaylo-ay ug pulong sa social media.
Nagkanayon si Mayor Chan nga gipasaka na ang kaso sa piskaliya hinungdan nga itugyan na lang kini sa hingtungdan nga ahensya ug nanghinaut nga mukalma na lang ang tanang nalambigit.
