Nanawagan og katin-awan ang kabanay sa piniriso nga si Fernando Abapo Prajes, nga gikatahong nakapalgang patay sulod sa Cebu City Jail, sa Barangay Kalunasan, Dakbayan sa Sugbo, niadtong Domingo sa hapon, Abril 26, 2026.
Matud ni Alias “Susan” ang Inahan sa biktima, nga adunay mitaho sa iyang usa ka anak, nga ang piniriso nga si Prajes, naglisod og ginhawa sulod sa rehas apan pagsusi sa mga kabanay niini nasuta nga wala nay kinabuhi ug adunay pipila ka mga bun-og sa kalawasan ang biktima.
Dugang niini, nga sa wala pa makabsan sa kinabuhi ang iyang anak, iya pa kining giduaw sa prisohan sa nakalabayng Dominggo, Abril 19, 2026.
Gihimug-atan sa mga kabanay nga kinahanglang adunay katin-awan sa hinungdan sa pagkamatay ni Prajes, ug magpahigayon og autopsy gumikan kay kuwestiyonable ang pagkakalas niini gumikan sa mga bun-og sa kalawasan.
Samtang nagduda usab ang mga kabanay nga adunay hazing nga nahitabo sulod sa prisohan.
Base sa nakalabayng mga taho, namatyagan ang biktima nga walay panimuot sulod sa iyang selda, ug mismo ang mga kaubang Persons Deprived of Liberty (PDLs) ang nagpahibalo sa mga awtoridad sa nahitabo hinungdan nga dali siyang gidala sa ospital, apan gideklarar kining dead-on-arrival.
Kahinumdoman nga nasikop si Prajes, sa kaulohan ug nasulod sa Cebu City Jail, gumikan kay siya ang gitudlo nga suspek sa pagpanglugos sa usa ka 11-anyos nga batang babaye sa Sitio Kalubihan, Barangay Kalunasan, Dakbayan sa Sugbo.
