CEBU CITY-Giawhag sa buhatan sa Bureau of Fire Protection – Cebu City Fire Station ang publiko nga mosalmot sa ipahigayon nga Kick-Off Ceremony Fire Prevention Month 2024 nga adunay tema nga ‘Pag-iwas sa sunog, hindi ka nag-iisa’ nga pormal nga ablihan ugmang adlawa, isip sugat sa buwan sa Marso.
Matud pa ni SFO2 Wendell Villanueva, ang tigpamaba sa Cebu City Fire Station nga ang maong kalihokan sugdan pinaagi sa usa ka motorkada diin sugod sa SRP paingon sa Pahina Central Fire Substation sa Barangay Pahina ning dakbayan sa Sugbo.
Gibutyag sa opisyal nga ang mga kalihokan sulod sa usa ka buwan naglakip sa marathon for a cause, poster ug essay writing contest, Pimp My Ride , tree planting project ug uban pa.
Sa pikas bahin, padayon gihapon ang pahimangno sa buhatan nga magbinantayon ug mag-amping hilabi na sa mga wiring sa kuryente arun sa paglikay sa mga moulbo nga sunog.
