Nagbilin og kinatibuk-ang kadaot sa imprastraktura ug agrikultura ang sunod-sunod nga bagyong Tino ug Uwan kay miabot na sa kapin sa P3-bilyones, sumala sa usa ka taho sa National Disaster Risk Reduction and Management Council (NDRRMC).
Kung diin ang mga hinabang nga pagkaon ug non-food items nga nagkantidad og P1-bilyon ang naapod-apod na sa mga apektadong lugar, samtang kapin sa 90,000 ka pamilya o 300,000 ka tawo ang nagpabilin sa mga evacuation center sa tibuok nasud.
Sa samang higayon, ang Department of Social Welfare and Development (DSWD) naghatag og P612-milyones nga tabang sa kapin sa 2.25 milyones nga mga pamilya nga naapektuhan sa bagyong Uwan.
Base sa rekord sa ahensya, kapin sa 12 milyon nga mga tawo ang naapektuhan sa Super Typhoon Uwan, diin nagbilin kini og P2.01-bilyones nga kadaot sa imprastraktura ug P182.38-milyones sa agrikultura.
Dili moubos sa 26 ka mga namatay ang gitaho, ug kapin sa 253,000 ka mga balay ang nadaot.
Samtang ang Bagyong Tino nagbilin usab og P490.11-milyones nga kadaot sa imprastraktura ug P484.87-milyones sa agrikultura, ug hinungdan sa 250 ka kamatayon ug kapin sa 265,000 ka nadaot nga mga balay.
Samtang, si DSWD Assistant Sec. Irene Dumlao nagtaho usab nga ang tanang apektadong pamilya nga ma-anaa man sa mga evacuation center o nagpuyo uban sa mga paryente kay kwalipikado nga makadawat og hinabang.
Apan kadtong naa sa mga evacuation center mas dali nga maserbisyohan tungod kay sila gi-profiling dayon.
