CEBU CITY-Desidedo ang kagamhanan sa dakbayan sa Sugbo nga pasakaan og kaso ang drayber nga nakadasmag sa traffic enforcer niadtong Lunes sa gabii, Setyembre 30, 2024.
Human nga nakita ni acting Cebu City Mayor Raymond Alvin Garcia ang video footage kay mipasalig kini nga mahatagan kini og tukmang aksyon diin gukdon ang drayber aron manubag sa maong panghitabo.
Gumikan matud pa niini nga dili aksidente ug tinuyo ang maong pagdasmag sa traffic enforcer.
Apan, atol sa pakighinabi sa Bombo Radyo Cebu kang Raquel Arce, ang head sa Cebu City Traffic Office diin mihatag usab sa iyang habig nga posibleng wala tuyoa sa babaye nga drayber ang pagdasmag gumikan usab walay nakita nga panaglalis tali sa mga nalambigit.
Bisan paman niini, gihagatan og gibug-aton ni Arce nga kinahanglang tubagon sa drayber ang iyang gihimo hinungdan nga hingusgan niini ang pagpasaka og kaso batok sa babaye.
Mao kini ang gihimo nga lakang sa opisyal agi’g depensa usab sa uban pang mga traffic enforcer tungod kay kung dili kini niya iduso, hangtud nalang sa areglo ang mahitabo ug dili kini makaangayon sa iyang mga kaubanan.
