Gisiguro sa kagamhanan sa dakbayan sa Sugbo nga hapsay ug malinawon ang pagsaulog sa kapiyestahan ni Sr. Sto, Nino sa umaabot January 18, hilabi na ang pag-organisar og pagtakdo sa espirituhanon ug kultural nga aspeto sa pagsaulog sa Sinulog.
Kini ang gibutyag ni Cebu City Councilor Dave Tumulak nga gisigurado sa kagamhanan ang kahapsay sa pagsaulog sa kapiyestahan taliwala sa kalahian niini sa nakalabayng tuig diin mas gikunhoran sa kagamhanan ang paggasto niini nga mokabat lamang sa 90 million pesos ang kinatibuk-ang pundo nga gigahin sa kagamhanan.
Sukwahi sa nakalabayng tuig nga adunay 115 million ang kinatibuk-ang budget sa pag-organisar og pagpahigayon niini, apan giklaro niini nga wala ra gihapoy mausab sa mga programa niini gumikan nakig-alayon ang dakbayan sa mga pribadong sector.
Sigon ni tumulak nga nakig-alayon na usab ang siyudad sa kagamhanan sa probinsya sa sugbo, aron sa pagpkitabang hilabi na sa pinansyal sa pagpreparar sa maong kapiyestahan, apan wala pa matino kung pila gayud ang ihatag sa probinsya.
Ibalik usab sa kagamhanan ang karaang ruta sa Sinulog, diin maglatas gikan sa Abellana padulong sa New Imus Road, General Maxilum subay usab sa Fuente Osmena, dayung pasulod sa Cebu City Sports Center diin mokabat sa 4.3 kilometros ang latasan,
Mokabat sa 17 ka mga barangay ang moapil sa dakbayan sa Sugbo, ug laing 8 ka partisipante sa probinsya ug laing 3 ka mga guest performer.
