Nimando ang Talisay City Government sa usa ka resort sa Brgy. Pooc, nga mohunong sa operasyon human sa nahitabong chemical leak, nga nakaangol sa 19 ka mga indibidwal.
Miluwat og kamanduan ang City Legal Office, adlawng Miyerkules, Septiyembre 3, sa Alcoseba’s Resort Hotel nga ipahunong diha-diha dayun ang ilang operasyon.
Dugang pa niini, ang kagamhanan sa siyudad mimando usab sa management sa resort nga mosumiter og written report, nga magpasabot sa insidente sulod sa lima ka adlaw.
Ang mga kopya sa mando, nga gipirmahan sa abogado nga si Giovanni Sususco, legal nga opisyal sa siyudad, gihatag ngadto sa mga sakop sa media.
Kahinumdoman nga Niadtong Martes, Septiyembre 2, usa ka gas explosion ang giingong nahitabo sa usa ka resort nga miresulta sa pagpagawas sa mga delikadong gas sama sa chlorine.
Gumikan niini, ang mga biktima gikatahong nakasinati og pagsuka, pagkalipong, pagdilaab sa mata, kalisud sa pagginhawa, ug pagkaluya sa lawas.
Una nang mibutyag si Mayor Gerald Anthony ‘Samsam’ Gullas nga dili angayang tugotan nga maka-operate ang resort samtang nag-ung-ong sa imbestigasyon.
Sa pagkakaron, gitambagan ang publiko nga likayan ang lugar alang sa kaluwasan.
