Nagplano ang Kagamhanan sa Dakbayan sa Sugbo nga mohatag og mga handheld metal detector sa mga security guard nga nadestino sa mga pampublikong eskwelahan isip kabahin sa mas lapad nga paningkamot sa pagpalig-on sa seguridad sa mga tunghaan.
Gipahibalo ni Cebu City Mayor Nestor Archival niadtong Biyernes, Hunyo 26, 2026, nga ang Dakbayan mangayo og pondo pinaagi sa Local School Board (LSB) aron makapalit og mga handheld metal detector para sa mga eskwelahan sa tibuok Dakbayan sa Sugbo.
Sigon niini nga ang inisyatibo kabahin sa gipauswag nga mga lakang sa seguridad nga maglakip usab sa pagpatuman sa mga protocol sa pagtubag sa emerhensya.
Lakip sa mga lakang mao ang pag-activate sa mga emergency alert buttons sa mga mobile phone, nga magtugot sa mga opisyal sa eskwelahan nga mapahibalo dayon ang mga awtoridad kung adunay mga emerhensya ug makatubag sulod sa lima ka minuto sa mga sakop sa kapulisan.
Ipakatap usab ang emergency hotline numbers sa mga eskwelahan ug uban pang mga pampublikong lugar aron masiguro ang dali nga pag-access panahon sa mga emerhensya.
Nakig-alayon nausab ang dakbayan sa Department of Education (DepEd),school administrators, CCPO ug uban pang mga stakeholder aron susihon ang kasamtangan nga mga security protocols ug masiguro nga ang mga eskwelahan andam sa pagtubag sa mga sitwasyon sa emerhensya.
Lakip sa ilang hisgutan ang campus access control, visitor monitoring, emergency reporting procedures ug koordinasyon tali sa mga eskwelahan ug law enforcement agencies.
