PROVINCE OF CEBU-Giawhag ni Cebu Governor Gwendolyn ang Bureau of Animal Industry (BAI) nga ilibkas ang color coding sa African Swine Fever (ASF) sa Sugbo tungod kay makaapekto kini sa lokal nga industriya sa baboy sa probinsiya.
Kini human ang mga hog raisers ug mga lokal nga opisyal sa Sugbo, partikular na sa Isla sa Camotes, nipadayag og kabalaka sa mga pagdili nga gipatuman sa mga silingang probinsiya batok sa mga baboy ug mga produkto sa baboy sa Sugbo.
Dugang pa, nga ang mga backyard hog raisers sa mga lokalidad sa Isla sa Camotes, lungsod sa Poro, San Francisco, Tudela, ug Pilar apektado karon sa pagdili sa pagsulod sa mga ilang mga baboy ngadto sa Leyte, partikular na sa Ormoc, nga maoy dakong target market sa mga hog raisers sa Isla sa Camotes.
Matud sa Gobernadora nga nakasabot siya nganong nipagawas og kamanduan ang Ormoc City sa pagdili sa pagsulod sa mga baboy gikan sa Probinsiya sa Sugbo ngadto sa ilang siyudad.
Dugang pa ni Garcia sukad niadtong buwan sa Marso ning tuiga, dihang gideklarar sa BAI nga dili na ASF-free ang Sugbo human nasuta nga positibo ang kaso sa dakbayan sa Carcar, Apan walay daghang nangamatay nga baboy sa probinsiya.
Gisaway pag-usab sa mga opisyal sa Kapitolyo ang BAI ug miingon nga ang bureau “walay mandato sa paghimo ug pagpatuman sa mga programa ug polisiya alang sa prevention, control ug pagwagtang sa mga animal diseases.//
Hinungdan nga nanawagan si Garcia sa Bureau of Animal Industry, nga ilibkas na ang coding sa Sugbo, ug gidapit niini ang tanang local chief executives gikan sa mga gobernador hangtod sa mga mayor nga maghiusa sa paghunong sa kontra-kabus ug madaugdaugong mga lakang sa Bureau of Animal Industry sa pag-atubang sa mga sakit sa baboy.
