PROVINCE OF CEBU- Plano sa kagamhanan sa Probinsya sa Sugbo, ang pagtukod og waste-to-energy (WTE) facility sa probinsya aron matubag ang nagkadako nga problema sa basura ug ang mga epekto niini sa kalikopan, lakip na ang pagbaha ug mga risgo sa landfill.
Matud ni Governor Pamela Baricuatro, nga ang proyekto sa WTE iduso pinaagi sa public-private partnership (PPP) ug anaa na sa pagplano.
Dugang ni Baricuatro nga ang gisugyot nga lugar alang sa PPP posibleng tukoron sa Dakbayan sa Naga diin ang nakolekta nga basura himuong enerhiya ug dayon ibaligya.
Gihimug-atan usab Gobernadora ang dinalian nga panginahanglan alang sa solid waste management human sa mga insidente sa kalikopan sama sa pagdahili sa Binaliw Landfill, sigon niini nga ang basura nakatampo usab sa grabeng pagbaha ug uban pang mga peligro.
Kusganon nga iduso sa Probinsya ang proyekto uban ang koordinasyon sa Regional Development Council (RDC), tungod kay kini nagkomplemento sa ubang mga prayoridad nga inisyatibo sama sa pagtukod og dam.
Samtang, gipasiugda usab niini ang panginahanglan alang sa malungtarong mga solusyon sa basura.
