PROVINCE OF CEBU-Gipasalig ni Gobernador Gwen Garcia sa mga lumolupyo sa Sitio CRCI sa Barangay Apas, dakbayan sa Sugbo nga dili sila papahawaon sa mga tigpatuman sa Bus Rapid Transit (BRT) project kon dili andam ang ilang relocation site.
Ang mga residente sa Cebu Rehabilitation Center Inc. kasamtangang nag-okupar sa mga lote nga gipanag-iya sa Kapitolyo kilid sa NFA regional headquarters sa may Gov.Mariano Cuenco Avenue kilid sa Cebu IT Park.
Matod ni Gobernador Gwen, ang BRT project implementers nagtan-aw niining CRCI area nga mahimong lugar alang sa usa sa mga bus station sa BRT, ang mga okupante ibalhin sa mga lote nga gipanag-iya sa Kapitolyo sa Brgy. Kalunasan, usa ka giplanohang lakang nga gihangop sa mga apektadong residente atol sa ilang tigom sa Hulyo 6 sa Capitol Social Hall.
Gipasalig sa gobernador nga andam una ang ilang relocation area sa dili pa makaguba ang BRT team sa ilang mga balay.
Nitambong usab ang mga residente sa Kalunasan nga nag-okupar usab sa mga lote nga gipanag-iya sa Kapitolyo.
Sa tabang sa Pag-IBIG Fund, gibaligya sa Kapitolyo kining mga lote ngadto sa mga nagpuyo pinaagi sa barato ug long-term financing terms sa ahensya.
Gikatakdang makigtagbo pag-usab sa mga residente sa Kalunasan ug CRCI ang ahensiya aron mahuman ang ilang kasabutan sa pagbaligya sa lote ug re-appraised nga balor sa maong mga lote.
