Kagamhanan sa Sugbu niluwat ug “Oplan Semana Santa” alang sa pagpangandam sa Dakbayan

CEBU CITY-Niluwat og executive order si Cebu City Mayor Michael Rama nga gitawag og “Oplan Semana Santa”, nga nagpasiugda sa pagpangandam sa dakbayan alang sa Semana Santa.

Kini ang gipahibalo ni Atty. Collin Rossel, ang City Administrator sa Cebu City,nga nimando si Mayor Rama sa tanang organizers sa nagkadaiyang kalihukan sa mga parokya sa pagbaton og lapad nga plano sa pagpatunhay sa kalinaw ug kahapsay sa ilang tagsa-tagsa ka dapit.

Dugang pa, giawhag sa mayor ang publiko nga magpabiling alerto karong Semana Santa aron malikayan ang bisan unsang dili maayong mga kahimtang nga mahitabo.

Gipasalig ni Rama nga alerto kaayo ang mga otoridad, ug importante nga makig-alayon kanila ang publiko.