Gitataw ni Danilo Arao , ang PUP Professor, ug Kontra Daya Convenor nga ang nagpadayong gubot sa sa Israel, US, Iran ug uban pang Middle Eastern Countries, adunday dakong epekto sa nasud sa aspeto sa presyo sukaranang mga palaliton, gumikan ang lana usa sa mga giangkat sa nasud nga Pilipinas ngadto sa Iran gawas sa Venezuela.
Dugang ni Arao, dili na makakurat nga si Presidente Ferdinand Marcos Jr. nakahuna-huna sa pagsuspenso o lifting sa excise taxes sa produktong lana.
Apan, gitino ni Arao, nga gawas sa tumong sa presidente, gikinahanglan usab nga papason na ang value added tax sa nasud, gumikan kay dili lang sa aspeto sa lana ang adunay posibilidad sa pagtaas sa presyo, apan lakip na usab sa mga sukaranang mga palaliton.
Mao kini ang gikabutyag ni Arao atol sa eksklusibong pakighinabi sa Bombo Radyo Cebu newsteam kaniya aron sutaon ang ilahang habig kabahin sa hisgutanan sa epekto sa kagubot karon sa mga pipila ka langyaw nga nasud, ilabi na sa mga imported nga mga produkto.
Gipanglangtawan usab ni Arao nga gikinahanglan nga Pilipinas dili hingpit nga magsalig sa suporta sa mga langaw nga nasud, partikular na sa Estados Unidos tungod kay daghan na og nahatag ang Pilipinas sa maong nasud, dili lamang sa hisgutanan kabahin sa kasabotang pang ekonomikanhon, apan lakip na usab ang kasabutang military.
Hinungdan nga adunay mga higayon nga dunay mga hungihong nga ang Pilipinas mao ang giingung target sa bisan unsang hostility sa mga namataang kaaway sa Estados Unidos kay tungod sa nagkalain-laing Onerous Agreement sama sa Visiting Forces Agreement ug sa Enhance Defense Cooperation Agreement.
Samtang, nahisgutan usab ni Arao ang posibilidad nga rason og nganung gibombahan sa Estados Unidos ang Iran gumikan kay adunay dyutay nga nuance niini tungod kay lakip usab ang Israel nga niatake sa Iran tungod kay aduna kini kaligotgot sa maong nasud kay gisuportahan sa Iran ang Hamas, Hezbollah, ug Houthi, kinsa ma konsiderang bug-at nga bagahe nga mga armadong grupo subay sa kagustohan sa Israel nga sakupon ang Palestine.
Busa, gitino ni Arao nga mas maayo nga adunay kasiguradohan ng kaluwasan sa mga Overseas Filipino Workers (OFW’s) sa mga nalambigit nga nasud niining kagubot, ug mas maayo nga likayan ang pagpakatag og walay kamatuoran nga impormasyon.
