Mipahayag si Cebu City Mayor Nestor Archival Sr. nga mi-arang-arang na ang kahimtang sa pagdumala sa basura sa dakbayan human na nabalda ang mga operasyon sa pagpangolekta sa mga barangay niadtong Enero 8 nga Binaliw landfill landslide.
Kini ang gibutyag sa mayor sa pakighinabi niini sa mga sakop sa tigbalita niadtong Lunes, Pebrero 16 diin gisaysay niini nga kung matuman ang bag-ong polisiya sa pag-segregate sa basura sa syudad kay muminos ang matampo nga basura sa landfill ug processing areas.
Gani gilauman sa opisyal nga posibleng nga karong semanahuna o sa musunod nga semana kay makasugod na ang dakbayan og paglabay sa basura niini didto sa landfill sa lungsod sa Aloguinsan sa kasadpang bahin sa probinsya sa Sugbo.
Gipanglantawan sab niini nga maabot na ang mga gihingusgan nga pagkuha og mga waste shredder aron ang mga barangay sa syudad kay maka-proseso sa ilang basura gikan sa ilang mga residente.
Gitutokan sab karon sa kagamhanang dakbayan ang pagpanghangyo sa bukirang barangay sa dakbayan sa sugyot nga dili na mulabay og basura sa mga landfill nga nakontrata sa kagamhanan ingon man sa awhag nga mag-composting na sila sa ilang mga tugkaran.
Samtang sa mga barangay doul sa downtown kay giawhag sab sa pagtutok sa segregation diin iproseso kini sa mga Materials Recovery Facilities (MRFs) sa syudad nga nahimutang sa Carbon Public Market, Block 27 sa Barangay Mabolo, ug sa South Road Properties (SRP).
Tinguha sa mga inisyatiba nga mapaminus pa ang madam-ok nga basura sa syudad sa mga landfills sa Consolacion ug Aloguinsan dili lang sa pagpaminus sa gastuhon apan ang pagpanalipod sab sa kinaiyahan.
