Gisugat sa dakong hagit ang mga sakop sa kabomberohan, tungod sa kahuot sa dalan ug hagip-ot nga agianan sa dihang niulbo ang usa ka sunog sa Sitio Riverside, Barangay Tejero, Cebu City, sayos buntag ning adlawng Sabado.
Kini tungod kay interior ang dapit nga nasunog ug dili maka-maneuver ang mga firetrucks, hinungdan nga napugos ang mga sakop sa Cebu City Fire Office sa pagpahigayon og engine relay diin gipangdugtong-dugtong ang mga hose gikan sa gawas nga bahin aron lang makaabot ang tubig ngadto sa kinauyokan sa kayo.
Mao kini ang gikabutuyag ni SFO3 Wendell Villanueva ang tigpamaba sa Cebu City Fire atol na sa iyang pakighinabi sa mga sakop sa tigbalita.
Matod ni Villanueva, nadawat nila ang alarma sa alas 5:22 sa buntag ug daling nisaka ngadto sa first alarm sa alas 5:32, gisundan sa second alarm sa alas 5:37, hangtud nga giisa kini sa third alarm sa alas 5:54 sa buntag.
Gani, gidugang niya nga adunay mga agianan sa dapit nga igo ra gyud sa tawo, hinungdan nga naglisod ang mga assets sa pagpenetrar dayon sa sulod nga portion sa maong luna nga nasunog.
Gihimug-atan usab ni Villanueva ang kamahinungdanon sa dako nga tabang sa presensya sa mga force multipliers gikan sa nagkalain-laing barangay ug mga fire brigade nga niabag sa pag-apula sa kalayo, diin oras lang ang milabay sa pakigbugno sa kalayo, nadeklarar kini nga under control ug fire out ang maong sunog sa alas 6:50 sa buntag.
Apan bisan paman, dili ikalimod nga gawas sa kahuot sa maong dapit kung diin niulbo ang sunog, lakip sa hagit nga ilang gisagubang mao ang kakuwangan sa mga pesonahe niini tungod kay ang ubang fire personnel nagpadayon usab sa ilang deployment sa Barangay Binaliw aron sa pagpangaykay sa mga indibidwal nga gituohang natabunan pa human sa nidahili nga landfill sa Binaliw 1.
Samtang sa datus sa mga awtoridad, usa ka residente ang naangol nga nailang si Jonathan Nuterte, 45 anyos, kinsa nakaangkon og paso sa iyang wala nga bukton.
