CEBU CITY- Mipahimangno ang Simbahang Katoliko nga ang paghandom sa All Saints’ Day ug All Souls’ Day alang sa atong mga kabanay nga anaa na sa pikas kinabuhi sa espirituhanong kalibutan nga malinawon ug maki-angayon og dili igahin ang panahon sa bisag unsang paglulinghayaw.
Kini ang gipaambit nga pamahayag ni Reverend Father Mechor Urgel, Pari sa Archdiocesan Shrine of San Nicolas de Tolentino sa eksklusibong pakighinabi niini sa Bombo Newsteam kabahin sa pagselebrar sa Kalag-kalag 2024.
Dugang pa niini nga karong panahona unta atong hinumduman isip pagtapos sa Liturgical Calendar sa pagpangandam sa pagkatawo ni Hesu Kristo sa Disyembre 25 nga ang kamatayon dili angay kahadlokan apan angay nga pangandaman tungod hinuwam lamang ang atong kinabuhi nga atong gihikay karon sa kalibutan gikan sa kinahitas-an.
Gitino niini nga sa pagkatinuod, sakit nga mawad-an og sakop sa pamilya o higala, apan niining panahona, atong hinumdoman ang talagsaong mga butang nga ilang gibuhat dinhi sa kalibutan dili lamang alang sa kalipay kondili uban sa dakong pagtuo nga mas maayo ang kinabuhing dayon labaw pa sa materyal nga makaplagan niining kalibotana.
Mensahe usab ni Rev. Fr. Urgel sa publiko ilabi sa mga Romano Katoliko nga tumanon ang mga tulumanon isip parokyahon sa paghandom karong panahon sa gugma og pagpangandam sa kinabuhing dayon.
