Nagsabot ang Cebu City Government aron masiguro nga ‘in-place’ na ang tanan subay na sa nagsingabot nga kalag-kalag.
Matud ni Konsehal Dave Tumulak nga lakip sa meeting mao ang ipatumang seguridad, traffic, ug pagpakatap sa mga kapulisan, brgy. tanod ug mga volunteers sa mga nagkadaiyang sam-ang, pantalan ug mga terminal.
Dugang pa ni Tumulak, nga adunay re-routing ug temporary closure nga mahitabo karong Nobyember 1 ug 2.
Adunay gipakatap nga mga medical team ug 14 ka mga ambulansya aron moresponde kung ugaling adunay makuyapan subay na sa bagang duot sa mga moduaw sa sementeryo.
Hangyo usab ni Tumulak sa publiko nga di pataka og labay sa basura kay adunay mga mag-roving sulod sa menteryo ug mamadlong.
Samtang naka-standby usab ang mga fire trucks ilabi na nga walay tawo ang mga kabalayan ug boarding house subay na sa pagbakasyon sa mga tagbalay karong kalag-kalag.
Hinuon anaa ang PROBE team sa pagtabang sa umaabot nga kalag-kalag kung diin sila ang naka-assign sa paghawan sa mga kadalanan ug naay mga sakyanan nga maka-distrak kay gisiguro nga makaagi gyud ang mga katawhan.
Samtang nagsugod na ang Cebu Environmental Sanitation and Enforcement Team (CESET) sa pagpakatap ug imporamsyon sa mga nagkadaiyang sam-ang.
Matod ni CESET head Grace Luardo nga naka-assign ang pagpanakop sa mga ginadili panahon sa kalag-kalag sama lang sa pagpanigarilyo, pagpataka og labay sa mga basura, ug uban pa.
Dugang pa ni Luardo nga adunay naka-assign nga sakop sa matag sam-ang alang sa pagmonitor sa gawas ug sulod nga bahin.
Kung maabtang manglabay og basura bisan asa, multahan ang violator og P500 o di ba kaha community service sa usa ka adlaw.
Samtang P2,000 sa masakpan nga manigarilyo o di ba kaha pasakaan kini ug kaso kung magmagahi.
Hangyo usab sa CESET head sa publiko nga mosunod lang sa mga patakaran para di ma-isyuhan. (lq)
